Dirty Politics !!

Ho chali hai ati ghinauni rashtra ki ye rajneeti,
Ro rahi janata yahan, kisko sunaye aap beeti..!!
Haal kya hai desh ka, sab jaante hai raaj neta,
Dekhta hai saamne per aankh apni moond leta..!

Vo bhala bhi kya galat hai, jeet ke aaya yahan,
Abhi use to dekhna hai, dhandhli maaya kahan..!!
Dhandhli uddeshya enka, dhandhli aadarsh hai,
Bhukmari, berozgari mai ye Bharatvarsh hai.....!!

Are kya fark padta hai, enke ghar diye hai jal rahe,
Aur yahan navjaat bachche bhukh mai hai pal rahe..!
Kya yahi bachche karenge rashtra ke nirmaan ko,
Jo bechare jujhate hai pet ko aur praan ko...........!!

Bas yahan per DARVIN siddhant (Servival of the Fittest) hi chal paa raha hai,
Shaktishali hi yahan do vakt roti kha raha hai.......!!
Shakti kya hai dekhna hai, shakti kahte hai kise?
Hai vo shareerik (physical) kahin, per hai kahin mastishk (mind) se....!!

Jo nahi dono kahin, vo shakti hai hathiyaar se,
Chhinta hai haq yahan per, lad jhagad kar waar se..!!
Kya galat hai vo bechara, prakrati (nature) ka siddhant hai,
Jeeta hai mar-maar kar tab bhukh karta shant hai.....!!

Badh rahe apraadh, to phir kaun hai doshi yahan,
Kaun hai khooni, darinda, kaun hai vahshi yahan...!
Jaante hai sab ese, per kaun badlega use,
Desh jab apna kya koi aur badlega ese...!!

To jagao aaj es soye hue parivesh ko,
Aur chuno unko jo samjhe raaj ko aur desh ko...!
Desh bhi hai ghar tumhara ghar ko hi bharte chalo,
Aur ghar chalate jis tarah, tum rashtra ko bhi le chalo....!!

Waiting for your comments,

----------------------------SHREYA TIWARI